Home Makala Jitihada za serikali kunusuru zao la pamba

Jitihada za serikali kunusuru zao la pamba

1144
0
SHARE

NA MWANDISHI WETU

ZAO la pamba ni miongoni mwa mazao makuu ya biashara hapa nchini ambayo yamekuwa yakitegemewa kuinua uchumi wa wakulima na Taifa kwa ujumla.

Hivi karibuni kumetokea hali ya sintofahamu kuhusiana na ununuzi wa zao hilo baada ya kutangazwa kwa bei elekezi ya Sh 1,200 kwa kilo moja katika mikoa yote inayozalisha zao hilo.


Bei elekezi ya pamba kwa msimu huu ilitangazwa Aprili 30, 2019 mkoani Shinyanga na ilitakiwa ianze kutumika kuanzia Mei 2, 2019. Hata hivyo ununuzi wa zao hilo ulianza kwa kusuasua jambo ambalo Serikali haikuridhishwa nalo.

Julai 14, mwaka huu ndipo Waziri Mkuu Kassim Majaliwa aliamua kuitisha kikao kilichojumuisha wakuu wa mikoa 11 inayolima pamba, wanunuzi wa zao hilo, taasisi mbalimbali za kifedha pamoja na Gavana wa Benki Kuu.

Kikao hicho kilichofanyika katika ukumbi wa Mtemi Isike Mwanakiyungi kilikuwa na lengo la kutafakari mwenendo wa zao la pamba ambalo ununuzi wake unaendelea lakini kwa kasi ndogo.

Waziri Mkuu baada ya kusikiliza changamoto za wanunuzi ambao wengi wao waliomba Serikali iwadhamini katika taasisi mbalimbali za fedha walizoomba mikopo kwa ajili ya kununua zao hilo kwa kuwa ilikuwa imekwama, Serikali ilikubali.

“Sasa tumefikia muafaka wa jambo hili kibali kitatoka na wote watakaopata dhamana ya mikopo hakikisheni fedha hizo zinaenda kutumia kwa ununuzi wa pamba kama ilivyokusudiwa na si vininevyo,” anasema Majaliwa.

Waziri Mkuu aliwaagiza wakuu wa mikoa na wilaya katika maeneo yote yanayolima pamba wawasimamie ipasavyo wanunuzi wote ili kuhakikisha fedha zitakazopatikana zinakwenda kutumika kununulia pamba.

Mwenyekiti wa Chama cha Wanunuzi Binafsi wa Pamba (TCA), Christopher Gachuma, aliishukuru Serikali kwa kukubali kuwadhamini pamoja na maelekezo yaliyotolwa kuhusu suala la ununuzi wa zao hilo.


Waziri Mkuu, baada ya kufanya kikao na wadau wa pamba wakiwemo na wanunuzi ambao walikubali kwenda kununua pamba iliyoko kwa wakulima, Julai 15, 2019 alifanya ziara katika Wilaya ya Igunga kwa lengo la kukagua mwenendo wa ununuzi wa pamba.

Akiwa katika ziara hiyo, Waziri Mkuu alianza kwa kukagua ghala la ununuzi wa pamba la AMCOS ya Mbutu na kisha alikwenda katika Kijiji cha Mwabakina na kukagua ghala la kununulia pamba la Mwabakima.

Baada ya kukagua maghala hayo alizungumza na wananchi wa maeneo hayo ambao wengi wao ni wakulima wa pamba ambapo aliwahakikishia kwamba hadi kufikia Julai 30 mwaka huu pamba yote iliyoko katika mikoa mbalimbali nchini itakuwa imeshanunuliwa na wakulima wote kulipwa fedha zao.

Alisema Serikali imeamua kuingilia kati suala la ununuzi wa pamba kutokana na kusuasua kwa soko kwa kutoa dhamana ili kuwawezesha wanunuzi kukopeshwa fedha na benki mbalimbali kwa ajili ya kununulia pamba kutoka kwa wakulima.

“Tunatambua adha mliyoipata tangu kuanza kwa msimu wa mwaka huu na hayo ni mapito tu. Nawasihi muwe na amani kwani Serikali yenu inafuatilia suala hili na Rais Dk. John Magufuli anataka kuona pamba yote inatoka kwa wakulima ili kuwawezesha kupata tija,” anasema.

Waziri Mkuu aliwasihi wakulima wa zao hilo na wakulima wa mazao mengine nchini wahakikishe mara baada ya kuuza mazao yao wanatenga fedha kwa ajili ya kununulia pembejeo watakazozitumia katika msimu ujao.

Wananchi kwa upande wao waliishukuru Serikali kwa hatua yake ya kuingilia kati suala la ununuzi wa zao la pamba pamoja na malipo kwa wakulima ambao tayari pamba yao walishaipeleka katika AMCOS zao.

Kwa upande wake Waziri wa Kilimo, Japhet Hasunga, anasema Serikali itahakikisha inaendelea kutafuta masoko ya mazao hayo ndani na nje ya nchi ili kuwawezesha wakulima kuwa na uhakika wa masoko na hivyo kujiongezea tija.

Anasema pia Srikali imedhamiria kufufua viwanda mbalimbali vya nguo hapa nchini ili kuwawezesha wakulima wa pamba kuwa na soko la uhakika.

“Kuhusu suala la maghala tunatambua tatizo hilo na tutahakikisha tunayaboresha ili pamba iweze kuhifadhiwa katika mazingira bora,” anasema Hasunga.

Kuhusu changamoto ya viuatilifu, Waziri Hasunga anasema Serikali itahakikisha vinapatikana kwa kuzingatia eneo husika ili kuweza kudhibiti wadudu waharibufu.