Home kitaifa Soka la vijana linahitaji falsafa sahihi ya taifa

Soka la vijana linahitaji falsafa sahihi ya taifa

445
0
SHARE

Mawazo Lusonzo

KILA  anayefanya vizuri anastahili pongezi.  Kinachoendelea  hivi sasa ndani ya  Shirikisho la Soka la Tanzania (TFF) kuhusiana na  juhudi za kuweka katika soka la  vijana linastahili kuungwa mkono na kupongezwa.

Tangu  kuingia kwa  awamu hii ya  uongozi  mpya ndani ya  TFF chini ya  Rais Wallace Karia kuna jambo linaonekana kama juhudi ya kuendeleza  soka la vijana wa  kila rika. Tunapongeza katika hili.

Tunapongeza kwasababau kuna mwanga  unaonekana, ikiwa ni pamoja na kuona namna shirikisho linavyoandaa timu za  taifa za vijana, lakini pia msisitizo uliopo wa kuwa na mashindano mengi ya  vijana wetu.

Kokote  duniani ambako mataifa yaliyoendelea kupitia  soka, hawakupata mafanikio ya njia ya mkato, bali ni kupitia  jitihada  kama hizi ambazo ndizo zilizoifanya  timu yetu ya  taifa ya vijana  chini ya  umri  wa miaka 17 ilipofanikiwea kutwaa ubingwa wa CECAFA mwaka huu.

Wakati huu wa  kupongeza  kinachoendelea juu ya  soka la  vijana, lazima  turejee pia  namna ambavyo soka la umri mdogo ili iwe dira ya kufika huko ambako mataifa mengine yamepiga hatua kwa  mikakati hii.

Pamoja na mikakati  hii,  tunachoendelea kusisitiza  kama ushauri  kwa TFF ni  kujikita pia katika kupambanua  falsafa ya  taifa  itakayotufikisha katika mafanikio. Hili ni jambo lingine la msingi.

Kupitia Falsafa  kama  hii  pia  iendane na  sera ya pamoja ambayo ndiyo itakayozaa matunda  kwa wanasoka  vijana tunaowaibua katika mashindano mbalimbali waweze kucheza soka la mfumo  wa pamoja kwa nchi nzima.

Mfumo  huo wa mashindano ya watoto  lazima ufanane kote nchini, ukienda Mbeya, Mwanza, Lindi, Pemba uone mfumo mmoja wa mashindano ili ukipata wachezaji wafanane kiuchezaji.

Kupatikana kwa falsafa sahihi ya kisoka  itarahisisha ngazi yote ya kusimamia  soka la vijana kwa  marika  tofauti, kwa maana ya kwamba, kijana aliyetoka Zanzibar, Pemba, Manyara, Lindi kufundishwa mpira wa aina moja kwasababu tayari  kuna falsafa ya nchi ambayo pia itaingia moja kwa moja kwenye timu za ligi kuu.

Kwa mfano ukiangalia ligi ya Ujerumani, Bundesliga, ukiangailia ligi ya Hispania, La Liga au Uholanzi, inavyocheza timu ya taifa ukienda kwenye klabu utaona wanacheza vilevile, mathalani, wanavyocheza Barcelona, Real Madrid, Valencia utaona wanacheza hivyo hivyo kwenye timu ya Taifa ya Hispania.

Ukienda Ujerumani ‘Staili’ ya uchezaji wa klabu inaendana na timu ya taifa. Hii ndio maana ya falsafa, kama taifa mnaamua kwamba hii ndio staili yetu ya uchezaji, kufundisha wachezaji na hapo ndipo unapata urahisi wa kufundisha mpira.

Kabla ya kukimbilia kwenye mashindano kwanza ni kukaa chini na wataalamu ili kutengeneza falsafa ya mpira wa Tanzania.

Hatua  nyingine  muhimu ni hii ya kutengeneza mfumo Lazima tuendeleze mikakati ya kuwa na mashindano ya vijana  yafanyike chini ya mfumo mzuri wa kimashindano wa kubaini vipaji na mfumo wa kuviendeleza vipaji hivyo, kama hatutilia mkazo hatua hii basi   lengo la kupata mafanikio ya juu halitafanikiwa.

Ukiachana na mikakati  iliyotajwa  hapo juu, kuna haja pia kwa shirikisho kuendelea kubuni mikakati ya  kuzalisha makocha wa kutosha, angalau kuwepo uwiano wa kocha mmoja kufundisha vijana 30, hapa inategemeana na bajeti yake.

Uanzishwe pia  mpango madhubuti wa kuzalisha makocha wengi ili kuwa na uwiano wa timu za vijana  zinazotakiwa kuanzishwa   kuanzia ngazi ya chini.

Kama nilivyogusia hapo juu , kama unataka kuwa na idadi kubwa ya vijana pia unatakiwa kuwa na wataalamu wengi wa kung’amua vipaji na kuviendeleza, usipokuwa na wataalamu utaishia kutengeneza kundi la wachezaji wa zamani na kuwagawa kwa maeneo wakati utaalamu wenyewe wa kubaini wachezaji hawana.

Pia suala la  kuwapo kwa miondombinu ya mpira na utawala kwenye ngazi zote ni   eneo kubwa na lililohitaji kupewa kipaumbele  kwa  viongozi  wajao.

Kipaumbele kingine muhimu kwa soka ni suala la kufanya utafiti na kubaini mbinu sahihi za kufundishia, kuna mabadiliko makubwa sana ya kiufundishaji, kabla ya kuanzisha mashindano ya kupata vijana, lazima tukae chini kufanya utafiti mzuri kupata njia sahihi za kufundishia mpira.

Lazima utengenezwe mfumo mzuri wa kisayansi wa kuweza kufundisha soka. Pia miundombinu bora ya kitabibu kwa ajili ya kuwapatia wachezaji tiba nzuri, waweze kupewa ushauri mzuri wa vyakula, sio kukimbia tu na kucheza mpira.

Haya  yakifanyika kwa  ufanisi, nina  imani kubwa  kuwa, ndoto ya  Tanzania  kufanya  vyema katika michuano ya kimataifa kupitia mkakati wa soka la  vijana  linaloambatana na  falsafa ya pamoja ya mfumo tunaotaka kuutumia kwa timu zetu za  taifa ya marika yote.